መጽሐፍ ቅዱስ

የመጽሐፍ ቅዱስ ጥናት

(በጮራ ቊጥር 3 ላይ የቀረበ)

ኦሪት ዘፍጥረት 2

መግቢያ፤ ይህ ምዕራፍ የምዕራፍ አንድ ማሟያ ነው፡፡ ምዕራፍ አንድ እግዚአብሔር ዓለምን እንዴትና ለምን እንደ ፈጠረ ሲገልጥ ታላቅነቱንና በላይነቱን ያሳያል፡፡

ምዕራፍ ሁለትም እግዚአብሔር ለሰው አስፈላጊውን ሁሉ እንዳዘጋጀ ሲገልጥ ሰው በዓለም መኖር እንዴት እንደሚገባው ያሳያል፡፡ ምዕራፍ አንድ “እግዚአብሔር” ሲል በምዕራፍ ሁለት ብዙ ጊዜ “እግዚአብሔር አምላክ” ይላል፡፡ ይህም ፈጣሪያችን ለሰው ያለውን ፍቅርና ጠባቂነት ያመለክታል (ያተኲራል)፡፡ (ስለ እግዚአብሔር ስሞች “የመጽሐፍ ቅዱስ መዝገበ ቃላት” የተባለውን መጽሐፍ ተመልከት)

ምዕራፍ ሁለትን ስታነብ የሚከተሉት ማስታወሻዎች ሊረዱህ ይችላሉ፡-

ቊ. 1 ሠራዊታቸውም፤ ጠቅላላ ፍጥረትን ወይም ከዋክብትን ወይም መላእክትን ሊያመለክት ይችላል፡፡

ቊ. 3 ቀደሰውም፤ ሰው በእግዚአብሔር መልክ ስለ ተፈጠረ አርኣያውን መከተል ይገባዋል (ዘፀ. 20፥8-11)፡፡

ቊ. 7 በአፍንጫውም የሕይወት እስትንፋስን እፍ አለበት፤ ይህ ቊጥር 1፥27ን ያብራራል፤ በፊት ከተፈጠሩት ሕያዋን ሁሉ ሰውን የሚለይ እግዚአብሔር ራሱ ከራሱ ሕይወትን በመስጠት ነውና ሰው ሕያው ነፍስ ሆነ፡፡ እንግዲህ የሰው ነፍስ ከእንስሳት ነፍስ እጅግ የተለየ ነው፡፡

ቊ. 9 የሕይወት ዛፍ፥ መልካምና ክፉን የሚያስታውቀው ዛፍ፤ እነዚህ ሁለት ዛፎች በገነት እንብርት ላይ በመከተላቸው ዋናው የሰው ክብር ከእግዚአብሔር ጋር መገናኘቱ መሆኑን ያሳያሉ፤ ምልክቶች እንጂ ምስጢራዊ ኀይል አልነበራቸውም፡፡ የሕይወት ዛፍ ሞት ሊገኝበት የማይችለውን (የማይቻለውን) ኑሮ ሲያመለክት (3፥22)፥ ሁለተኛው ዛፍ ሰው ለእግዚአብሔር ያለውን ፍቅርና መታዘዝ (ወይም አለመታዘዝ) ይገልጥ ነበር፡፡ የትኲሳት መለኪያ የሰውን ሁኔታ እንደሚያሳይ ሁሉ ይህም ዛፍ ሰው ከእግዚአብሔር ጋር የነበረው ግንኙነት ምን ዐይነት መልክ እንደ ነበረው ያሳያል፡፡ ሰው ቢበላ ወይም ባይበላ በመልካምና በክፉ  መካከል ያለውን ልዩነት ወደ ማወቅ በበረከት ሁኔታ ወይም በፍርድ ሁኔታ ይደርስ ነበር፡፡

ቊ.  15 እግዚአብሔር ባዘጋጀው ስፍራ መሥራት ትልቅ ዕድል ነው፡፡

ቊ. 20 አዳም ስም አወጣላቸው፤ በዚህ ተግባሩም እግዚአብሔር የሰጠውን ሥልጣን አረጋግጧል (1፥28)፡፡

ቊ. 24 ስለዚህ ሰው … ይተዋል፤ አዳም ቤተ ሰብን በማቋቋምና ስም በመስጠት (23፤ 3፥20) መሪና ኀላፊ ነበረ፡፡

አንድ ሥጋም ይሆናሉ፤ ሁለት አካላት ሆነው አንድነታቸው ምስጢር ነውና በዐላማ፥ በዕቅድ፥ በስሜት ወዘተ. እንጂ በግብረ ሥጋ ብቻ አይወሰንም፤ ይህ አንቀጽ ልጆችን ስለ መውለድ እንኳን አይናገርም፡፡ አንድነታቸውም በእግዚአብሔር ዘንድ ያለውን አንድነት ሊያሳስብ ይችላል (1፥26-27፤ ኤፌሶን 5፥31-32)፡፡

ጥያቄ፤

1. እግዚአብሔር ለሰው ላዘጋጃቸው ለሚከተሉት መልካም ነገሮች ማስረጃዎች የሚገኙባቸውን የጥቅሶችን ቊጥሮች ጻፍ፡-

  የእረፍት ቀን                                                        

  ምቹ ቦታ                                                    

  አጥጋቢ መብል                                              

  ተስማሚ ሥራ                                              

  የሞራል ምርጫ                                             

  ተገቢ ሥልጣን                                              

  አስደሳች ጓደኛ                                                      

2.     እነዚህ ነገሮች ስለ እግዚአብሔር ደግነት ምን ያስተምራሉ?

                                                                                                                                                                                               

3.     አንተ በእግዚአብሔር አምሳል ሆነህ የእረፍትን ቀን እንዴት ማክበር ይገባሃል (2፥3)?

                                                                                                                                                                                           

4.     ሰው ለዐላማ የተፈጠረ መሆኑን ስታስተውል ዛሬ ለምታደርገው ሁሉ ምን ለውጥ ያመጣልሃል (15)?

                                                                                                                                                                                           

5.     የሁለቱ ዛፎች ዐላማው ምን ነበረ (9፥17)?

                                                                                                                                                                                           

6.     ከቊ. 18-25 ጋብቻን በተመለከተ ሀ) ስለ እግዚአብሔር፥ ለ) ስለ ወንድ፥ ሐ) ስለ ሴት ድርሻ (ሚና) ምን ትማራለህ?

                                                                                                                                                                                           

7.     የሁሉቱ ዛፎች ከዛሬው ከቤተ ክርስቲያን ምስጢራት (ከጥምቀትና ከቅዱስ ቊርባን) ጋር ምን ተመሳሳይነት ይታይባቸዋል (ሆሴዕ 6፥7፤ ማቴዎስ  26፥ 27 ተመልከት)

 ወንድና ሴት ለጋብቻ ራሳቸውን ሲያዘጋጁ ይህ አንቀጽ ምን መመሪያ ይሰጣቸዋል?